Ռուսաստանի հայտարարությունները զարմանալի և շփոթեցնող են․ Ադրբեջանի ԱԳՆ

Ռուսաստանի Դաշնության Արտաքին գործերի նախարարության հայտարարությունը՝ «Ադրբեջանական ավիաուղիներ» (AZAL) ընկերությանը պատկանող ինքնաթիռի վթարի համար ապահովագրական վճարումների հարցի վերաբերյալ, զարմանալի և շփոթեցնող է հանրության համար։ Այս մասին հայտարարել է Ադրբեջանի Արտաքին գործերի նախարարության մամուլի ծառայության բաժնի ղեկավար Այխան Հաջիզադեն։

Հաջիզադեն ընդգծել է, որ Ռուսաստանում գրանցված ապահովագրական ընկերության կողմից AZAL-ին և ուղևորներին ապահովագրական վճարումների կատարման հարցերը և Ադրբեջանի կողմից ինքնաթիռի կործանման համար Ռուսաստանի կառավարությունից փոխհատուցման պահանջը բոլորովին տարբեր թեմաներ են.

«Նշված ապահովագրական վճարումների կատարման գործընթացը տվյալ ընկերության կողմից իրականացվում է արդեն 6 ամիս։ Ընդհանուր առմամբ, այդ վճարումները տրամադրվում են AZAL-ի ապահովագրական պայմանագրից բխող պարտավորություններին համապատասխան՝ ընկերության կողմից ինքնաթիռի և ուղևորների ապահովագրության շրջանակներում։ Ինչ վերաբերում է ռուսական ապահովագրական ընկերության կողմից վճարումների կատարման հարցին, ապա պետք է նշել, որ սովորաբար ինքնաթիռների ապահովագրությունն իրականացվում է համապատասխան միջազգային ապահովագրական ընկերությունների միջոցով։

Հաշվի առնելով, որ Ռուսաստանի տարածքում ոչ մի միջազգային ապահովագրական ընկերություն չի գործում, AZAL ինքնաթիռի ապահովագրությունն իրականացվել է ռուսական ընկերության միջոցով։ Այսպիսով, ապահովագրական վճարումներն Ադրբեջանի կողմից Ռուսաստանի կառավարությունից պահանջվող փոխհատուցման հետ նույնացնելու փորձերը սխալ են»,- ասել է Ադրբեջանի Արտաքին գործերի նախարարության մամուլի ծառայության բաժնի ղեկավար Այխան Հաջիզադեն։