Հայաստանն ու Հնդկաստանը պատրաստվում են ստորագրել բազմամիլիարդանոց պաշտպանական պայմանագիր
Հնդկաստանն ու Հայաստանը մոտ են բազմամիլիարդանոց պաշտպանական համաձայնագրի կնքմանը, որի ընդհանուր արժեքը, ըստ Republic World-ի աղբյուրների, գնահատվում է 3,5–4 միլիարդ դոլար։ Փաստաթուղթը նախատեսում է համագործակցություն ռազմարդյունաբերական ոլորտում՝ ընդգծելով Հայաստանի հակաօդային պաշտպանության, հրթիռային համալիրների և հրետանային կարողությունների արդիականացումը։
Հնդկական կողմը քննարկում է Հայաստանին նոր սերնդի Akash-NG զենիթահրթիռային համակարգերի վաճառքը։ Այս մոդելը ունի մեծ հեռահարություն և կարող է դառնալ Հայաստանի ՀՕՊ համակարգի առաջին պաշտպանական շերտը։ Նախկինում Հայաստանը ձեռք էր բերել Akash համակարգերի կարճ հեռահար տարբերակներ։
Բացի այդ, բանակցությունների շրջանակում քննարկվում է BrahMos հրթիռների համատեղ արտադրության հնարավորությունը Հայաստանում, ինչպես նաև Pinaka համազարկային կրակի համակարգերի նոր խմբաքանակի մատակարարումը։ Առաջին նման մատակարարումն արդեն իրականացվել էր 2023 թվականին։
Հիշեցնենք, որ 2022-ից Հնդկաստանը դարձել է Հայաստանի հիմնական ռազմարդյունաբերական գործընկերը՝ մատակարարելով հակատանկային համալիրներ, հաուբիցներ և անօդաչու թռչող սարքերի դեմ պայքարի համակարգեր։ Թեև պաշտոնական Երևանը վերջին շրջանում հայտարարել է ռազմական ծախսերի կրճատման մասին, նոր բանակցությունները վկայում են, որ պաշտպանական համագործակցությունը Հնդկաստանի հետ շարունակում է մնալ առաջնահերթ ուղղություն։
