Ալյասկայի գագաթնաժողովի արդյունքները կազդեն ԵՄ 19-րդ հակառուսական պատժամիջոցների վրա
Անքորիջում կայացած Ռուսաստան-ԱՄՆ գագաթնաժողովի արդյունքները կազդեն ԵՄ երկրների կողմից հակառուսական պատժամիջոցների 19-րդ փաթեթի քննարկման վրա։ Այս մասին ՏԱՍՍ-ին հայտնել է Բրյուսելի դիվանագիտական առաքելություններից մեկի աղբյուրը։
«Յուրաքանչյուր նոր պատժամիջոցների փաթեթի հաստատման համար անհրաժեշտ է ԵՄ բոլոր երկրների կողմից փոխզիջում, և ԱՄՆ-Ռուսաստան գագաթնաժողովի արդյունքները անկասկած կազդեն անդամ երկրների տրամադրության վրա», - ասել է նա՝ մեկնաբանելով Եվրահանձնաժողովի (ԵՀ) ներկայացուցիչ Արիանա Պոդեստայի հայտարարությունը Ռուսաստանի դեմ պատժամիջոցների 19-րդ փաթեթը դեռևս սեպտեմբերին ընդունելու ԵՀ-ի մտադրության մասին։
Աղբյուրը հայտնել է, որ ԵՄ արտաքին գործերի նախարարների կողմից նոր պատժամիջոցների փաթեթի վերաբերյալ առաջին քննարկումը սպասվում է օգոստոսի 29-30-ը՝ Կոպենհագենում կայանալիք ոչ պաշտոնական հանդիպման ժամանակ։
Դիվանագետը հրաժարվել է մեկնաբանել նոր պատժամիջոցների փաթեթի հնարավոր բովանդակությունը, սակայն նշել է, որ եթե Եվրահանձնաժողովը ցանկանում է այն ընդունել ընդամենը մեկ ամսում, ապա դրանում առաջարկվող միջոցառումները պետք է «բավականաչափ անխնդիր» լինեն ԵՄ երկրների համար:
Ավելի վաղ հայտնել էինք, որ Եվրոպական դիվանագիտության ղեկավար Կալլասը հայտարարել էր Ռուսաստանի դեմ պատժամիջոցների 19-րդ փաթեթի պատրաստման մասին։
