Զախարովան անդրադարձել է Փաշինյան-Թրամփ-Ալիև հանդիպման ընթացքում ստորագրված համատեղ հռչակագրին
ԱՄՆ-ում Հայաստանի և Ադրբեջանի ղեկավարների հանդիպումը արժանի է դրական գնահատականի, սակայն տարածաշրջանայինից դուրս խաղացողների ներգրավումը չպետք է լրացուցիչ դժվարություններ ստեղծի, ասել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան։
«Մենք հետևողականորեն աջակցում ենք բոլոր այն ջանքերին, որոնք նպաստում են տարածաշրջանային անվտանգության այս կարևոր նպատակին հասնելուն։ Այս առումով, Վաշինգտոնում ամերիկյան կողմի միջնորդությամբ Հարավային Կովկասի հանրապետությունների ղեկավարների հանդիպումը արժանի է դրական գնահատականի։ Մենք հույս ունենք, որ այս քայլը կնպաստի խաղաղության օրակարգի առաջխաղացմանը», - ասել է Զախարովան Արտաքին գործերի նախարարության կայքում հրապարակված մեկնաբանության մեջ։
Նա հավելել է, որ Հարավային Կովկասի խնդիրների լուծման լավագույն տարբերակը տարածաշրջանի երկրների կողմից մշակված լուծումների գտնելն ու իրականացումն է՝ իրենց հարևանների՝ Ռուսաստանի, Իրանի, Թուրքիայի աջակցությամբ։
«Տարածաշրջանից դուրս խաղացողների ներգրավումը պետք է նպաստի խաղաղության օրակարգի ամրապնդմանը և չստեղծի լրացուցիչ դժվարություններ և բաժանարար գծեր։ Մենք կցանկանայինք խուսափել Մերձավոր Արևելքում հակամարտությունների լուծման գործում Արևմուտքի օգնության տխուր փորձից», - նշել է դիվանագետը։
Մոսկվան լրացուցիչ կվերլուծի Վաշինգտոնից տարածաշրջանային հաղորդակցությունների ապաշրջափակման վերաբերյալ հայտարարությունները, ասել է Զախարովան։
«Այս ոլորտում Ռուսաստանի մասնակցությամբ եռակողմ համաձայնագրերը, որոնցից ոչ մի կողմ չի դուրս եկել, մնում են արդիական։ Կարևոր է նաև հաշվի առնել Հայաստանի անդամակցության գործոնը ԵԱՏՄ միասնական մաքսային տարածքում, մասնավորապես՝ հանրապետության տարածքով տարանցիկ բեռնափոխադրումների կազմակերպման առումով», - ասվում է մեկնաբանության մեջ։
