ԱՄՆ Պետդեպը հայտարարություն է արել Թրամփ-Փաշինյան-Ալիև հանդիպման վերաբերյալ
ԱՄՆ Պետդեպարտամենտը չի պատրաստվում շահարկել Երևանի և Բաքվի միջև ապագա խաղաղության համաձայնագրի մանրամասները կամ պաշտոնական հայտարարություններից առաջ անցնել։ Այսօր լրագրողների հետ ճեպազրույցի ժամանակ այս մասին ասել է գերատեսչության պաշտոնական ներկայացուցչի տեղակալ Թոմի Պիգոտը։
Լրագրողը հարց էր ուղղել սպասվող եռակողմ հանդիպման և դրա հնարավոր արդյունքների մասին՝ խնդրելով մանրամասներ հայտնել նաև այսպես կոչված «Զանգեզուրի միջանցքի», ԱՄՆ-ի դերակատարման մասին, ինչպես նաև հետաքրքրվել էր, թե ինչ դեր ունի Թուրքիան այս ամբողջ գործընթացում։
«Թե՛ նախագահը, թե՛ պետքարտուղարը բազմիցս ասել են, որ հույս ունեն շուտով ստորագրված համաձայնագիր տեսնել։ Պետքարտուղարը հաճախ է ասում այդ մասին, երբ հնարավորություն է ունենում։ Երբ մենք հայտարարելու բան ունենանք, կհայտարարենք։ Ես չեմ պատրաստվում շահարկել կամ այդ հայտարարություններից առաջ անցնել»,- ասել է նա։
Ավելի վաղ հայտնել էինք՝ վաղը Հայաստանի Հանրապետության վարչապետ Նիկոլ Փաշինյանը այց կկատարի Ամերիկայի Միացյալ Նահանգներ։ Փաշինյանը երկկողմ հանդիպում կունենա Ամերիկայի Միացյալ Նահանգների նախագահ Դոնալդ Ջ. Թրամփի հետ։
