Սողանք, տարհանում. Լարսը փակ է բոլոր տեսակի տրանսպորտային միջոցների համար

Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը փակ է բոլոր տեսակի տրանսպորտային միջոցների համար: Այս մասին հայտնում է ՀՀ ՆԳՆ-ն։

Ըստ վրացական ԶԼՄ-ների՝ վրաց-ռուսական ցամաքային սահմանի տարածքում տեղի է ունեցել սողանք: Դարիալի անցակետում հայտարարվել է տարհանում։ Թերեք գետի մակարդակը բարձր է։ Կազբեգի անցակետի աշխատանքը նույնպես ժամանակավորապես դադարեցվել է։

«Դարիալի սահմանային անցակետից տարհանվել են պարեկային ոստիկանությունը, մաքսային ծառայությունը, սահմանային ոստիկանությունը և անցակետում աշխատող բոլոր մասնավոր ընկերությունները։ Տեղում են գտնվում Ներքին գործերի նախարարության բոլոր համապատասխան ստորաբաժանումները՝ մոնիթորինգի նպատակով. տուժածներ չկան»,- ասվում է Վրաստանի Ներքին գործերի նախարարության հայտարարության մեջ։