Ռուսաստանում ձերբակալվել են 4 ադրբեջանցի ձեռնարկատերեր՝ ոստիկանությանը կաշառելու համար

Ռուսաստանի Լենինգրադ մարզում ձերբակալվել են 4 ադրբեջանցի ձեռնարկատերեր՝ տեղական ոստիկանության ղեկավարությանը կաշառելու մեղադրանքով։ 

Ինչպես հաղորդում են ռուսական լրատվամիջոցները, գործողությունը սկսվել է Լենինգրադի մարզի Վսևոլոժսկի շրջանի 128-րդ ոստիկանական բաժանմունքի պետ, փոխգնդապետ Սերգեյ Կորոտկովի ձերբակալությամբ: 

Ռուսաստանի քննչական կոմիտեի տվյալներով՝ ոստիկանապետը մեղադրվում է ադրբեջանցի ձեռնարկատերերից առնվազն 3,7 միլիոն ռուբլի կաշառք ստանալու մեջ։

Ադրբեջանցի ձեռնարկատերերը մեղադրվում են «մաքսանենգ ալկոհոլ և ծխախոտ վաճառելու, ինչպես նաև անօրինական միգրանտներ հավաքագրելու» մեջ։ Ձերբակալված ադրբեջանցի գործարարներ Վուսալ Օրուջովը, Իբադաթ Իսմայիլովը, Ասիֆ Ալլահվերդիևը և Արաստուն Թալիբովը մեղադրվում են ձերբակալված իրավապահ մարմինների աշխատակիցներին կաշառելու մեջ: Կալանավորվածները անազատության մեջ կմնան մինչև սեպտեմբերի 9-ը։

Փորձագիտական հանրության կարծիքով՝ այս ձերբակալությունները կարելի է դիտարկել Ռուսաստանի և Ադրբեջանի միջև հարաբերություններում լարված իրավիճակի համատեքստում որպես ադրբեջանական սփյուռքի վրա համակարգային ճնշման դրսևորում։