Սրանք քաղցած կոկորդիլոսներ են․ Զախարովան՝ «Կամավորների կոալիցիայի» մասին

Այսպես կոչված «Կամավորների կոալիցիայի» մասնակիցները նման են զոմբիների, նրանք վտանգավոր են, քանի որ անհագ են։ Այս մասին հայտարարել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան, գրում է Lenta.ru-ն։

«Պարզապես մտածեք այդ մասին՝ «Կամավորների կոալիցիա»։ Առողջ մարդը, ով արտաքին քաղաքականության մասին մեկնաբանություններ անելու կարիք չունի, ինքն իրեն հարցեր է տալիս. ի՞նչ է սա։ Ո՞վ է սա։ Սրանք քաղցած կոկորդիլոսներ են։  Նրանք ինչ-որ բան են ուզում, բայց չեն կարողանում ձևակերպել, թե ինչ։ Սակայն ակնհայտ է, որ նրանք վտանգավոր են, քանի որ անհագ են», - ասել է դիվանագետը։

Զախարովան հիշեցրել է, որ նախկինում արևմտյան երկրները իրենց միավորումների համար անուններ էին ընտրում՝ հիմնվելով «միֆոլոգեմների, կրոնական հայացքների կամ պատմական ավանդույթների» վրա։ Սակայն, այժմ, նրա կարծիքով, սա «լիակատար անհեթեթություն» է թվում։

Հավելենք՝ Մեծ Բրիտանիայի և Ֆրանսիայի գլխավորությամբ ձևավորվել է «Կամավորների կոալիցիա»-ն, որին միացել են մի շարք երկրներ։ Կոալիցիայի կենտրոնական մասը անվտանգության ուժերն են, որոնք կազմված կլինեն արևմտյան զինվորներից և ի վերջո կտեղակայվեն Ուկրաինայի տարածքում։