Իսրայելի և ԱՄՆ-ի ագրեսիան դարձել է սպառնալիք Մերձավոր Արևելքի անվտանգության համար․ Արաղչի

Իսրայելի և Միացյալ Նահանգների ագրեսիան Իրանի դեմ դարձել է աննախադեպ սպառնալիք ամբողջ Մերձավոր Արևելքի անվտանգության համար: Այս մասին հայտարարել է Իրանի արտաքին գործերի նախարար Աբբաս Արաղչին, գրում է «ՏԱՍՍ»-ը։

Ինչպես նշված է Իսլամական Հանրապետության արտաքին գործերի նախարարության հայտարարության մեջ, Արաղչին ընդգծել է, որ «սիոնիստական ​​և ամերիկյան ռեժիմների ռազմական ագրեսիան, որը հստակորեն խախտում է ՄԱԿ-ի կանոնադրությունը և միջազգային իրավունքը, ինչպես նաև միջուկային զենքի չտարածման ռեժիմը, դարձել է աննախադեպ սպառնալիք ամբողջ Արևմտյան Ասիայի անվտանգության և կայունության համար»։ 

Հիշեցնենք՝ Իսրայելը հունիսի 13-ի գիշերը ռազմական գործողություն սկսեց Իրանի դեմ։ Մեկ օր անց հանրապետությունը պատասխան հարձակում իրականացրեց։ Միացյալ Նահանգները հակամարտության մեջ մտավ սրացումից ինը օր անց՝ հարվածելով Սպահանում, Նաթանզում և Ֆորդոյում գտնվող իրանական միջուկային օբյեկտներին։  Իրանը պատասխան հարվածներով  հարձակվեց Մերձավոր Արևելքի ամենամեծ ամերիկյան ավիաբազայի՝ Կատարի Ալ Ուդեյդի ավիաբազայի վրա։ Դրանից հետո ԱՄՆ նախագահ Դոնալդ Թրամփը հայտարարել էր, որ Իսրայելը և Իրանը համաձայնության են եկել հրադադար հաստատելու հարցում։