Թուրքիայում ԱՄՆ դեսպանը կքննարկի «Հըզբոլլահ»-ի զինաթափման հարցը
Թուրքիայում ԱՄՆ դեսպան Թոմ Բարաքը, որը նաև միջնորդ է Լիբանանի և Իսրայելի միջև սահմանային խնդիրների կարգավորման հարցերում, դիվանագիտական առաքելությամբ կժամանի Բեյրութ։
Al Nahar թերթի փոխանցմամբ՝ ԱՄՆ հատուկ դեսպանը Լիբանանի ղեկավարության հետ կքննարկի շիա «Հըզբոլլահ» շարժման զինաթափման հարցը, որը պետք է նախորդի իսրայելական զորքերի դուրսբերմանը երկրի հարավում գտնվող հինգ օկուպացված տարածքներից։ «Հըզբոլլահը» պատրաստակամություն է հայտնել համագործակցել Լիբանանի իշխանությունների հետ, բայց դեռևս կոնկրետ պարտավորություններ չի ստանձնել զենքը հանձնելու հարցում։
Պարբերականի փոխանցմամբ՝ Լիբանանի նախագահ Ժոզեֆ Աունը մտադիր է ԱՄՆ-ից «ամուր երաշխիքներ» պահանջել։ Դրանք հիմնականում վերաբերում են Իսրայելի ագրեսիվ գործողությունների դադարեցմանը, որոնք խախտում են 2024 թվականի նոյեմբերի 27-ին կնքված հրադադարի համաձայնագիրը և թույլ չեն տալիս վերականգնողական աշխատանքներ սկսել Լիբանանի հարավի տուժած շրջաններում։
