Արբեջանի ԱԳՆ-ն անընդունելի է համարել Ռուսաստանի պահվածքը
Ադրբեջանի Հանրապետությունում Ռուսաստանի Դաշնության արտակարգ և լիազոր դեսպան Միխայիլ Եվդոկիմովը կանչվել է Արտաքին գործերի նախարարություն։ Այս մասին տեղեկանում ենք Ադրբեջանի արտաքին գործերի նախարարության պաշտոնական կայքէջից։
«Փոխարտգործնախարար Արազ Ազիմովի հետ հանդիպման ժամանակ Ռուսաստանին է ներկայացվել ադրբեջանական կողմի բողոքը՝ կապված երկու երկրների միջև հարաբերությունները խաթարող ոչ բարեկամական գործողությունների և քայլերի հետ։ Ռուսաստանի իրավապահ մարմինների ուշադրությունը կրկին հրավիրվել է հունիսի 27-ին Եկատերինբուրգում ադրբեջանցիներով բնակեցված տների վրա կատարված խուզարկությունների ժամանակ մեր երկու հայրենակիցների մահվան և ինչպես նաև այդ խուզարկությունների ժամանակ մեր երկրի քաղաքացիներին ծանր մարմնական վնասվածքներ պատճառելու անօրինական գործողությունների վերաբերյալ։ Միջադեպի ռուսական բացատրությունը հակասում է մեր մահացած հայրենակիցների մարմինների վրա բռնության ակնհայտ նշաններին և փորձագիտական եզրակացությանը»,- նշվում է հաղորդագրության մեջ։
Ընդգծվել է, որ ռուսական լրատվամիջոցներում խուզարկությունների վերաբերյալ նկատվել են էթնիկ անհանդուրժողականության դրսևորումներ, և որ անընդունելի է «էթնիկ հանցավոր խումբ» արտահայտությունների օգտագործումը ադրբեջանցիների նկատմամբ։
