Իրանցի գործակալները փորձել են սպանել ԱՄՆ նախկին պետքարտուղար Պոմպեոյին

Իրանցի գործակալները առնվազն երեք անգամ փորձել են սպանել ԱՄՆ պաշտոնյաներին, այդ թվում՝ նախկին պետքարտուղար Մայք Պոմպեոյին:

The Washington Post-ը, հղում անելով «2024 թվական. ինչպես Թրամփը կրկին նվաճեց Սպիտակ տունը, իսկ դեմոկրատները կորցրեցին Ամերիկան»  երեք լրագրողների գրքին, հաղորդում է, որ 2021 թվականից ի վեր իրանցի գործակալները առնվազն երեք անգամ փորձել են սպանել նախկին և ներկա ամերիկացի պաշտոնյաներին։

2022 թվականին իրանցի գործակալները պարզել են Մայք Պոմպեոյի գտնվելու վայրը Ֆրանսիայում։ Սպանությունը կանխվել է։ Ավելի վաղ, իր հուշագրություններում նախկին պետքարտուղարը գրել է Պահապանների կորպուսի կողմից 1 միլիոն դոլարով մարդասպան վարձելու փորձի մասին։

Իրանից սպառնալիքների պատճառով Թրամփի շուրջ անվտանգության միջոցառումները ուժեղացվել են։ Նրա Մար-ա-Լագոյի նստավայրը պահպանվել է ինչպես ռազմական ճամբար։ 2023 թվականին WP-ն և NYT-ն հաղորդել են, որ Թրամփի թիմը տեղեկատվություն է ստացել Թեհրանի ծրագրերի մասին։ ԱՄՆ Արդարադատության նախարարությունը հաստատել է, որ մահափորձը կանխվել է։ Իսրայելի վարչապետը նույնպես խոսել է Թրամփին սպանելու սպառնալիքի մասին։

Իրանի նախագահ Պեզեշկիանը հերքել է մեղադրանքները: «Իրանը երբեք չի փորձել կամ չի ծրագրել որևէ մեկին սպանել»,- ասել է նա: