Նոր հոկտեմբերի 27 է կանխվել. Փաշինյան

Կարևոր է արձանագրել, որ բացահայտվել է մեր պետականության, ՀՀ անվտանգության և կայունության դեմ նախապատրաստվող հանցագործություն: Այս մասին հայտարարել է Հայաստանի վարչապետ Նիկոլ Փաշինյանը:

 «Առավոտյան հարցը քննարկել եմ նաև հանրապետության նախագահի հետ: Կարծում եմ՝ իմաստ կունենա ԱԱԾ, դատախազության ՔԿ-ի ՆԳՆ ոստիկանության առավել արդյունավետ գործած աշխատակիցներին ներկայացնել պարգևատրման և պետական պարգևի»,- ասել է նա:

Փաշինյանի խոսքով՝ ահռելի ծավալով ինֆորմացիա է հրապարակվել և այս պահին չունի հրապարակվածից բացի ավելի ասելու բան:

«Համոզված եմ՝ արդյունավետ քննություն տեղի կունենա և հետագա ընթացքի մասին մեր իրավապահները հանրությանը կիրազեկեն: Ուզում եմ մի հարցի վրա մեր ուշադրությունը հրավիրել:

Երեկվա քննարկումներից մի բան իմ ուշադրությունը գրավեց: Օգտատերերի մի խումբ արձանագրում էր, որ Հայաստանում նոր հոկտեմբերի 27 է կանխվել, մի ուրիշ խումբ էլ հարց էր բարձրացնում՝ արդյոք 1999-ին ՀՀ իրավապահ մարմինենրը կարող էին կանխել հոկտեմբերի 27-ի ահաբեկչությունը:

Սա մի հարց է որի պատասխանը պետք է փորձենք վստահելի ձևով ձևակերպել: Հույս ունեմ, որ մեր իրավապահ համակարգը այս հարցի պատասխանը գտնելու ուղությամբ նույնպես ջանքեր կգործադրի»,- եզրափակել է Փաշինյանը: