Մի շարք գյուղատնտեսական ապրանքների արտահանման ժամանակավոր արգելք կգործի

Ցորեն, մեսլին, գարի, եգիպտացորեն, հնդկացորեն, արևածաղկի սերմ, արևածաղկի ձեթ, ՀՀ-ից այս գյուղատնտեսական արտադրատեսակների արտահանման նկատմամաբ   6 ամիս ժամկետով, արգելք է սահմանվել։  Այս մասին որոշումն ընդունվել է Կառավարության այսօրվա նիստում։ 

Ըստ հիմնավորման՝ նշված ապրանքների մասով ներքին արտադրությունը չի բավարարում ՀՀ շուկայի պահանջարկը, ինչն ապահովվում է հիմնականում ներմուծման ծավալների հաշվին, ըստ այդմ՝ որոշումն ուղղված է ՀՀ պարենային անվտանգության և տնտեսության կայունացման ապահովմանը։

Նշենք, որ ՀՀ կառավարությունը 2024 թվականի նոյեմբերին ընդունել էր որոշում, համաձայն որի՝ սահմանվել էր արտահանման ժամանակավոր արգելք՝ 6 ամիս ժամկետով, որի գործողությունը կավարտվի 2025 թվականի հուլիսի 4-ին։ Սույն որոշման նախագծով առաջարկվում է ևս 6 ամիս ժամկետով երկարաձգել արտահանման արգելքը։