Սա բացահայտ միջամտություն է Հայաստանի ներքին գործերին․ Արարատ Միրզոյան
Ազգային ժողովի հարցուպատասխանի ժամանակ ՀՀ ԱԳ նախարար Արարատ Միրզոյանը արձանագրել է՝ «Երեկ Ռուսաստանի պետական հեռուստաընկերության եթերում հնչել են անընդունելի կոչեր, խեղաթյուրված գնահատականներ, վիրավորանքներ, այդ թվում՝ անձնական բնույթի»։
Նրա խոսքով՝ նույնաբովանդակ հայտարարություններ եղել են նաև ՌԴ քաղաքական գործիչների կողմից.
«Հայաստանը սա համարում է ոչ միայն հակասող Հայաստան-Ռուսաստան բարեկամությանը և դա ամրագրող իրավական փաստաթղթերին, այլև ուղղակի բացահայտ միջամտություն ՀՀ ներքին գործերին և ոտնձգություն մեր ինքնիշխանության դեմ»,- ասել է Միրզոյանը։
Նա նշել է, որ այդ մասին տեղեկացրել են ՌԴ գործընկերներին․
«Կարծում եմ՝ այս ժամի դրությամբ պաշտոնական հայտագիրը պետք է որ հասած լինի հասցեատիրոջը»,- ասել է Միրզոյանը։
