Ուկրաինայում հրադադարը տարածաշրջանը կվերածի Ղարաբաղի․ Մեդինսկի

Ռուսաստանի նախագահի օգնական, Կիևի հետ բանակցություններում ռուսական պատվիրակության ղեկավար Վլադիմիր Մեդինսկին Ուկրաինայի գրավյալ տարածքները համեմատել է Լեռնային Ղարաբաղի հետ՝ ԼՂ-ն անվանելով վիճելի տարածք Հայաստանի և Ադրբեջանի միջև:

Մեդինսկին հայտարարել է, որ Ուկրաինայում ռազմական գործողությունների դադարեցումը կարող է ստեղծել այնպիսի իրավիճակ, ինչպես Լեռնային Ղարաբաղում է:

«Եթե խաղաղության մասին հիմա չպայմանավորվենք, այլ պարզապես կնքենք ինչ-որ զինադադար, ապա այդ տարածաշրջանը կվերածվի հսկայական Ղարաբաղի։ Որոշ ժամանակ անց, Ուկրաինան ՆԱՏՕ-ի հետ կփորձի նվաճել այն, և դա կլինի մոլորակի վերջը, դա կլինի միջուկային պատերազմ: Մենք չենք ցանկանում, որ ստեղծվի նոր չճանաչված Ղարաբաղ, որը պատճառ կդառնա միջուկային պատերազմի համար»,- ասել է նա։

Նրա խոսքով՝ Ռուսաստանը ցանկանում է լիարժեք խաղաղություն կնքել՝ նոր տարածքների ճանաչմամբ։

 Ավելի վաղ հայտնել էինք` Ռուսաստանը Ղարաբաղը պաշտոնապես ճանաչել է Ադրբեջանի տարածք: