Լարված բախումներ՝ Լոս Անջելեսում․ նոր կադրեր են հրապարակվել

Լոս Անջելեսում միգրացիոն քաղաքականության դեմ անցկացվող բողոքի ցույցերը վերաճել են լարված բախումների։

ԱՄՆ նախագահ Դոնալդ Թրամփն արձագանքել է Լոս Անջելեսում բողոքի ցույցերի ժամանակ տեղի ունեցած բախումներին` հայտարարելով, որ «նախկինում մեծագույն ամերիկյան քաղաքը» գրավվել է ապօրինի միգրանտների կողմից:

«Հիմա բռնի, ապստամբ ամբոխները հարձակվում են մեր դաշնային գործակալների վրա՝ փորձելով խոչընդոտել արտաքսման գործողություններին, սակայն այս ապօրինի խռովությունները միայն ամրապնդում են մեր վճռականությունը», - գրել է ԱՄՆ նախագահը:

Նա հայտարարել է, որ հանձնարարել է ներքին անվտանգության և պաշտպանության նախարարներին, ինչպես նաև գլխավոր դատախազ Փեմ Բոնդիին «ձեռնարկել բոլոր անհրաժեշտ միջոցները Լոս Անջելեսը միգրանտների ներխուժումից ազատելու և խռովություններին վերջ դնելու համար»:

Կալիֆոռնիայի նահանգապետ Գևին Նյուսոմն էլ հայտարարել է, որ ԱՄՆ նախագահ Դոնալդ Թրամփը «ճգնաժամ է ստեղծել և ավելի է վատթարացնում այն» Լոս Անջելեսում, որտեղ օրեր շարունակ բողոքի ցույցեր են տեղի ունենում միգրանտների զանգվածային արտաքսման դեմ:

Նահանգապետը նաև կոչ է արել ԱՄՆ նախագահին «հետ քաշվել»: Նյուսոմը նշել է, որ իրավախախտները կձերբակալվեն, և տեղական պաշտոնյաները պլանավորում են ապահովել խաղաղ ցուցարարների և օրենքի շրջանակներում գործող իրավապահ մարմինների աշխատակիցների անվտանգությունը։

Ավելի վաղ Դոնալդ Թրամփի վարչակազմը հայտարարել էր, որ Լոս Անջելեսում ապօրինի միգրանտների արտաքսման դեմ բողոքող ցուցարարների հետ բախումների պատճառով կտեղակայվի 2000 գվարդիական: