Չի բացառվում, որ Սամվել Շահրամանյանը կկալանավորվի. ArmLur

Արցախի նախագահ Սամվել Շահրամանյանը վերջին մեկ ամսում արդեն 5-6 անգամ հարցաքննության է հրավիրվել ՀՀ քննչական կոմիտեի զինվորական քննչական գլխավոր վարչություն։ Տեղեկությունը հայտնում է ArmLur.am-ը։

Ըստ կայքի` գործը վերաբերում է Արցախի Հանրապետության հանձնմանը, պատերազմի ժամանակ ցուցաբերած զինվորական պաշտոնեական անփութությանը, ինչպես նաև զենք-զինամթերք և սպառազինությունը թշնամուն հանձնելուն։

«Մեդիահարթակներում վաղուց շրջանառվում էր տեղեկություն առ այն, որ Սամվել Շահրամանյանին կալանավորելու են առաջիկայում, ինչը նշանակում է, որ 2026 թվականի ընտրություններին ընդառաջ գործընթացներ են զարգանում Շահրամանյանի շուրջ»,– գրում է լրատվականը:

ԶԼՄ–ն իրավապահ համակարգին մոտ կանգնած իր աղբյուրներից պարզել է, որ վերը հիշատակված քրեական վարույթի շրջանակում հարցաքննվել են նաև այլ անձիք, այդ թվում` Արցախի պաշտպանության նախկին նախարար Սամվել Բաբայանը։ Ու սա ենթադրել է տալիս, որ գուցե հենց նրա դիմումի հիման վրա էլ հարուցվել է վարույթը, որի շրջանակում Արցախի նախագահը հրավիրվել է ՔԿ։