Մոտ 5 միլիարդ եվրո կտրամադրվի Ուկրաինային

Գերմանիան լրացուցիչ մոտ 5 միլիարդ եվրո կհատկացնի Ուկրաինային ռազմական օգնության համար: Այս մասին այսօր հայտնել է Գերմանիայի պաշտպանության նախարարությունը՝ պաշտպանության նախարար Բորիս Պիստորիուսի և իր ուկրաինացի գործընկեր Ռուստեմ Ումերովի հանդիպման արդյունքներով։

«Ուկրաինայի զինված ուժերին աջակցության նշված ծառայությունների ընդհանուր ծավալը կազմում է մոտ 5 միլիարդ եվրո: Գումարը գոյանալու է Բունդեսթագի կողմից արդեն հաստատված միջոցներից: Ուղղակի ներդրումներն ուկրաինական ռազմական արդյունաբերության մեջ և ռազմական ընկերությունների միջև համագործակցությունը գերմանական կառավարության հայտարարված նպատակն է Ուկրաինայի պաշտպանունակության երկարաժամկետ և կայուն ամրապնդման համար», - ասվում է Գերմանիայի պաշտպանության նախարարության հայտարարության մեջ:

Հավելենք՝ Գերմանիայի կանցլեր Ֆրիդրիխ Մերցը Ուկրաինայի նախագահ Վլադիմիր Զելենսկու հետ մամուլի ասուլիսի ժամանակ հայտարարել էր, որ Գերմանիան կաջակցի Ուկրաինային սեփական հեռահար զենք մշակելու հարցում։