Զախարովան՝ հնարավոր խաղաղության և ՌԴ դիրքորոշումների մասին
Ռուսաստանը շարունակում է մշակել ուկրաինական հակամարտության կարգավորման վերաբերյալ հուշագիր, որը կներառի նաև խաղաղության պայմանագրի կնքման ժամկետը։ Այս մասին հայտարարել է ՌԴ Արտաքին գործերի նախարարության պաշտոնական ներկայացուցիչ Մարիա Զախարովան, գրում է «ՏԱՍՍ»-ը։
«Ռուսաստանը շարունակում է մշակել ապագա խաղաղության պայմանագրի վերաբերյալ հուշագրի նախագիծը, որը սահմանում է մի շարք դիրքորոշումներ, ինչպիսիք են կարգավորման սկզբունքները, հնարավոր խաղաղության պայմանագրի ժամկետները և հնարավոր զինադադարը որոշակի ժամկետով։ Եթե, իհարկե, ընդգծում եմ, համապատասխան պայմանավորվածություններ ձեռք բերվեն»,- ասել է Զախարովան՝ հավելելով, որ փաստաթուղթը պատրաստ լինելուց անմիջապես հետո կփոխանցվի ուկրաինական կողմին։
Դիվանագետը նաև նշել է, որ Ուկրաինան նմանատիպ աշխատանք է տանում և պատրաստում է իր առաջարկները, որոնք մտադիր է ուղարկել ռուսական հուշագրի ստացման հետ միաժամանակ։
Հավելենք՝ Զախարովան մտահոգություն է հայտնել Ուկրաինայի նախագահ Վլադիմիր Զելենսկու գործողությունների վերաբերյալ, ով, ըստ նրա, փորձում է բարդացնել խաղաղության գործընթացը՝ պահանջելով Ռուսաստանի դեմ խստացնել պատժամիջոցները և ավելացնել զենքի մատակարարումները։
