ԱԺ-ն մերժեց «Պատիվ ունեմ» խմբակցության նախագիծը
«Պատիվ ունեմ» խմբակցության նախաձեռնած «Հայրենական մեծ պատերազմի 80–ամյակի առիթով» հայտարարության նախագիծը 27 կողմ, 54 դեմ, 2 ձեռնպահ ձայներով չընդգրկվեց Ազգային ժողովի լիագումար նիստերի օրակարգ։
Մինչ քվեարկությունը «Պատիվ ունեմ» խմբակցության քարտուղար Տիգրան Աբրահամյանը հայտարարեց, որ հանձնաժողովում նախագիծը քննարկվեց լրիվ այլ ենթատեքստում` աշխարհաքաղաքական շահերի բախման, փաստերի խեղաթյուրման և թեմայից չբխող երկրորդական մեկնաբանություններով։
«Միևնույնն է` ինչ էլ անես, ինչ էլ ասես, կան պատմական փաստեր, որոնք խմբագրել հնարավոր չէ»,– հայտարարեց նա։
Հավելենք, որ «Պատիվ ունեմ» խմբակցության հայտարարության մեջ, մասնավորապես, նշվում է, որ 80 տարի առաջ քաղաքակիրթ մարդկությունը, համատեղ ջանքերի և մեծ զոհողությունների շնորհիվ, հաղթանակ տարավ նացիստական Գերմանիայի և նրա դաշնակիցների նկատմամբ: Երկրորդ համաշխարհային պատերազմը, որն աննախադեպ էր իր մասշտաբներով, էապես քաղաքակրթական պայքար էր քսենոֆոբիայի դեմ: «Պատիվ ունեմ»–ի հայտարարությունը նաև անդրադառնում էր 1992 թ. մայիսի 9–ին Շուշիի ազատագրմանը` որպես հայ ժողովրդի փառահեղ հաղթանակի։
