Կարևոր է կառավարել այդ երկիրը և բանակը մեկ կենտրոնից. Էրդողան

Սիրիայի ժամանակավոր առաջնորդ Ահմեդ ալ-Շարաայի հետ Ստամբուլում կայացած հանդիպման ժամանակ Թուրքիայի նախագահ Ռեջեփ Թայիփ Էրդողանը խոսել է հարևան երկրի տարածքային ամբողջականության պահպանման կարևորության մասին: Նա հայտարարել է Դամասկոսի հետ համապարփակ կապեր զարգացնելու Անկարայի մտադրության մասին։

«Նախագահ Էրդողանը բանակցությունների ժամանակ հայտարարել է, որ կարևոր է պաշտպանել Սիրիայի տարածքային ամբողջականությունը և կառավարել երկիրը և բանակը մեկ կենտրոնից։ Նա մատնանշել է Իսրայելի կողմից Սիրիայի տարածքում օկուպացիայի և ագրեսիայի անընդունելիությունը և Թուրքիայի վճռականությունը՝ շարունակել դրան հակազդել բոլոր հարթակներում։

Էրդողանը նաև հայտարարել է, որ Թուրքիայի և Սիրիայի միջև երկկողմ հարաբերություններն ու համագործակցությունը կշարունակեն զարգանալ բոլոր ոլորտներում, այդ թվում՝ էներգետիկայի, պաշտպանության և տրանսպորտի ոլորտներում»,- հայտնում են Թուրքիայի ղեկավարի վարչակազմից: 

Հավելենք, որ Սիրիայի ժամանակավոր ղեկավարի Թուրքիա այցի մասին չի հայտարարվել։