ՌԴ-ի հետ կապված երկու ընտրություն ունենք․ Միրզոյան

ԱԳ նախարար Արարատ Միրզոյանը հայտարարել է, որ հայ-ռուսական հարաբերություններում կան խնդիրներ, որոնք ոչ ՀՀ-ն, ոչ էլ ՌԴ-ն չեն ժխտում։

«Մենք ունենք երկու ընտրություն՝ հիմնվել տարբերությունների վրա և այդ տարբերությունների հետագա ընթացքն ուղղել ավելի բացասական հուն, կամ հակառակը՝ հիմնվել ընդհանուր շահերի վրա, ընդհանուր հետաքրքրությունների վրա, իհարկե, փոխադարձ հարգանքի ապահովմամբ, միմյանց ինքնիշխանության, ինքնիշխան որոշումների հարգանքի ապահովմամբ ուղղել հարաբերությունները դրական հուն:

Կարող ենք անվերջ կենտրոնանալ անցյալի վրա, քիչ առաջ էլ որոշակի դրվագով խոսեցինք անցյալի իրադարձություններից: Բայց իմ համոզմունքը, ՀՀ դիրքորոշումն այն է, որ մեզ ՌԴ-ի հետ կապում են ամուր գործընկերային կապեր, ունենք աճող տնտեսական հարաբերություններ, ամուր մշակութային կապեր և պետք է կարողանանք զարգացնել մեր հարաբերությունները՝ հիմնվելով այս դրական ընկալումների, դրական ձեռքբերումների վրա»,- ասել է նա: