Ինձ թունավորել էին մկնդեղով և սնդիկով․ Թուրքիայի ԱԳ նախարար

Թուրքիայի արտգործնախարար Հաքան Ֆիդանը հայտնել է, որ չորս-հինգ տարի առաջ իրեն մկնդեղով ու սնդիկով թունավորելու փորձ է արվել։ Այս մասին հայտնում է 24TV հեռուստաալիքը։

«Դա ծանր թունավորում էր մկնդեղով և սնդիկով: Թունավորումը տեղի է ունեցել ինչ-որ տեղ, իսկ հետո բացահայտվել է թեստերի արդյունքում: Դա տեղի է ունեցել չորս-հինգ տարի առաջ»,- ասել է Ֆիդանը։

Թուրք նախարարը չի մանրամասնել, թե ով կարող էր կատարած լինել թունավորման փորձը։ Բայց նա նշել է, որ «թշնամիները գոյություն ունեն ոչ միայն երկրի ներսում, այլ նաև դրսում»:

Ֆիդանը արտգործնախարարի պաշտոնը ստանձնել է 2023 թվականին, մինչ այդ նա գլխավորել է Թուրքիայի Ազգային հետախուզական կազմակերպությունը։