Այս խնդիրը պետք է լուծվի․ այդ հարցը պետք է ներառվի պակիստանա-հնդկական բանակցությունների օրակարգում․ Խավաջա Ասիֆ

Պակիստանը պատրաստ է Հնդկաստանի հետ բանակցություններում դրանց անցկացման դեպքում քննարկել երեք առանցքային հարց, այդ թվում՝ Քաշմիրի խնդիրը, անդրսահմանային ահաբեկչությունը և Ինդուս գետի ջրերի համատեղ օգտագործումը։ Այս մասին հայտնել Է Պակիստանի պաշտպանության նախարար Խավաջա Ասիֆը Geo News հեռուստաալիքին տված հարցազրույցում։

«Հնդկաստանի հետ հարաբերություններում մենք ունենք երեք հիմնական խնդիր՝ Քաշմիր, ահաբեկչություն և ջուր։ Դրանք գոյություն ունեն վերջին 76 տարիների ընթացքում: Պակիստանն ահաբեկչության ամենամեծ զոհն է, և այս խնդիրը պետք է լուծվի, ինչպես նաև Քաշմիրի հարցը, որի պատճառով Պակիստանն ու Հնդկաստանը երեք անգամ կռվել են միմյանց դեմ։ Այդ տարածքի հարցը պետք է ներառվի պակիստանա-հնդկական բանակցությունների օրակարգում»,- ասել է նախարարը:

Ասիֆի խոսքով՝ Հնդկաստանի հետ Ինդուս գետի ջրերի օգտագործման շուրջ վեճը կարգավորվել է, երբ 1960 թվականին ստորագրվել է համապատասխան պայմանագիր, որի գործողությունը չի կարող կասեցվել Նյու Դելիի միակողմանի որոշմամբ:

«Մայիսի 10 -ին Հնդկաստանի հետ հրադադարի մասին պայմանավորվածության ձեռքբերումը մեզ համար դիվանագիտական հաղթանակ էր, որը տարել Էր Պակիստանի կողմից այդ երկրի հետ հակամարտությունում զսպվածության և ռազմական հզորության դրսևորման արդյունքում»,- հավելել է Խավաջա Ասիֆը։