Հնդկաստան-Պակիստան հակամարտության սրման ֆոնին ԱՄՆ-ն իր օգնությունն է առաջարկել
ԱՄՆ պետքարտուղար Մարկո Ռուբիոն հեռախոսազրույց է ունեցել պակիստանյան բանակի գլխավոր հրամանատար Ասիմ Մունիրի հետ՝ Իսլամաբադին առաջարկելով Վաշինգտոնի օգնությունը Հնդկաստանի հետ հակամարտության կարգավորման հարցում։
Հաղորդվում է, որ Ռուբիոն շարունակել է հորդորել երկու կողմերին գտնել դեէսկալացիայի ուղիները և առաջարկել ԱՄՆ-ի աջակցությունը կառուցողական բանակցություններ սկսելու համար։
Ավելի վաղ պետքարտուղարը զրուցել է նաև Հնդկաստանի արտաքին գործերի նախարար Սուբրահմանյամ Ջայշանկարի հետ և ԱՄՆ-ի աջակցությունն առաջարկել՝ ընդգծելով հակամարտության կողմերի միջև ուղիղ հաղորդակցության վերականգնման անհրաժեշտությունը։
Նշենք, որ Ջամու և Քաշմիր նահանգներում Պակիստանի հարձակման հետևանքով զոհվել է 5 մարդ, այդ թվում՝ բարձրաստիճան պաշտոնյա։ Ավելի վաղ հայտնել էինք, որ Պակիստանը Հնդկաստանի դեմ լայնածավալ ռազմական գործողություն է սկսել։
