Իրանը զսպվածության կոչ է արել Պակիստանին և Հնդկաստանին

Իրանի արտգործնախարար Աբբաս Արաղչին Թեհրանից մեկնել է Նյու Դելի՝ Հնդկաստանի բարձրաստիճան պաշտոնյաների հետ հանդիպելու համար, հաղորդում է Mehr-ը։

Նյու Դելի այցի ընթացքում Իրանի բարձրաստիճան դիվանագետը նախատեսում է քննարկել երկկողմ հարաբերությունները, փոխադարձ հետաքրքրություն ներկայացնող հարցեր, ինչպես նաև տարածաշրջանային և միջազգային վերջին զարգացումները։

Հնդկաստանի բարձրաստիճան պաշտոնյաների հետ փոխադարձ հետաքրքրություն ներկայացնող հարցերի շուրջ խորհրդակցություններից բացի, Իրանի և Հնդկաստանի արտգործնախարարներ Աբբաս Արաղչիի և նրա հնդիկ գործընկեր Սուբրամանյամ Ջայշանկարի նախագահությամբ նաև Իրան-Հնդկաստան տնտեսական համագործակցության համատեղ հանձնաժողովի նիստ տեղի կունենա։

Բացի դրանից, այցի ընթացքում կքննարկվի երկու երկրների միջև տնտեսական համաձայնագրերի իրականացման վերջին վիճակը։

Հաշվի առնելով Պակիստանի և Հնդկաստանի միջև լարվածության վերջին սրումը, Իրանը խոր մտահոգություն է հայտնել Հնդկաստանի և Պակիստանի միջև ռազմական լարվածության աճի կապակցությամբ և երկու կողմերին կոչ է արել զսպվածություն ցուցաբերել և խուսափել հետագա սրացումից։

Հավելենք՝ Հնդկաստան կատարած այցից առաջ Աբբաս Արաղչին այցելել էր Պակիստան։