Խուզարկել են դատավորի տունը և խոշոր չափերի գումար հայտնաբերել

ArmLur.am-ին հասած բացառիկ տեղեկությունների համաձայն՝ իրավապահները խուզարկել են դատավոր Արտուշ Գաբրիելյանի տունը և խոշոր չափերի գումար են հայտնաբերել:

Ինչպես նշել է թերթը՝ հայտնաբերված գումարի չափը կազմում է մոտ 550 հազար դոլար:

Գաբրիելյանի փաստաբան Էրիկ Ալեքսանյանից փորձել են հասկանալ՝ խուզարկել են, թե ոչ, և այդքան գումար հայտնաբերվել է, թե ոչ։ Ի պատասխան՝ վերջինս հայտնել է, որ դատավոր Արտուշ Գաբրիելյանի կալանավորման որոշումը բողոքարկել են, և նախաքննության շահերից ելնելով այլ բան  փաստաբանը չի կարող հայտնել:

Մայիսի 2-ին դատավոր Արտուշ Գաբրիելյանը կալանավորվել է, նա այս պահին գտնվում է Վարդաշեն քրեակատարողական հիմնարկում:

Հակակոռուպցիոն կոմիտեն պաշտոնապես հայտարարություն է տարածել, որ ըստ Հակակոռուպցիոն կոմիտեի, կաշառք տալու, ստանալու և կաշառք ստանալուն օժանդակելու դեպքերի առթիվ ՀՀ քրեական օրենսգրքի համապատասխան հոդվածներով ՀՀ հակակոռուպցիոն կոմիտեում նախաձեռնված քրեական վարույթի շրջանակներում 2025 թվականի ապրիլի 29-ին Երևան քաղաքի առաջին ատյանի ընդհանուր իրավասության քրեական դատարանի Շենգավիթ նստավայրում ՀՀ դատական իշխանության ներկայացուցչի մասնակցությամբ իրականացվել է ապացուցողական գործողություն։

Քրեական վարույթով նախաքննությունը շարունակվում է։

Արտուշ Գաբրիելյանի վարույթում դեռևս 2011 թվականից մեկ քրեական գործ է քննվել, որը վերաբերել է խոշոր խմբաքանակի հերոին տեսակի թմրամիջոց Հայաստան տեղափոխելու և Երևան քաղաքում խոշոր չափերի թմրամիջոցների ապօրինի շրջանառությանը և ըստ նախնական վարկածի, դատավոր Արտուշ Գաբրիելյանը ձգձգել է գործը այնքան, որ լրանա 15 տարին, որ վաղեմության ժամկետի հիմքով այս գործով անցնող հերոինի «պարագլուխ» Զոհրաբ Յեզգատյանին ազատի պատժից:

Քրեական վարույթով կալանքի տակ են ևս երկու անձ, որոնցից մեկը դատավոր Արտուշ Գաբրիելյանի ընկերն է ու կաշառք տվող անձը: