Հութիները հարվածել են Թել Ավիվի ռազմական օբյեկտին
Յեմենական «Անսար Ալլահ» շարժման հութի ապստամբները հայտարարել են, որ անօդաչու թռչող սարքի միջոցով ոչնչացրել են իսրայելական ռազմական օբյեկտ Թել Ավիվի շրջանում։ Այս մասին հայտնել է հութիների կազմավորած զինված ուժերի ներկայացուցիչ Յահյա Սարիան, գրում է ТАСС–ը:
«Յեմենի զինված ուժերը իրականացրել են օպերացիա՝ օկուպացված Յաֆֆո շրջանում (Թել Ավիվ) գտնվող իսրայելական ռազմական օբյեկտը անօդաչու սարքով ոչնչացնելու համար», – ասել է շարժման ներկայացուցիչը հութիներին պատկանող Al Masirah հեռուստաալիքի եթերում։
Իսրայելի բանակն ավելի վաղ հայտնել էր անօդաչու թռչող սարք որսալու մասին, որը մոտենում էր երկրի օդային սահմաններին արևելքից։ Բանակի մամուլի ծառայության տվյալներով՝ սարքը ոչնչացվել է մինչև Իսրայելի օդային տարածք ներխուժելը։
