Իրանը կոշտ պատասխան է տվել Թրամփին. Արաղչի

Վաշինգտոնը Թեհրանի արտաքին քաղաքական որոշումներին միջամտելու իրավասություն չունի: Այդ դարաշրջանն ավարտվել է 1979 թ.-ին։ Այս մասին X սոցիալական ցանցում գրել է Իրանի արտգործնախարար Աբաս Արաղչին պատասխանելով ԱՄՆ նախագահ Դոնալդ Թրամփի՝ Իրանին ուղղված կոչին՝ դադարեցնել աջակցությունը Եմենի հութիներին: Նա նաև կոչ է արել Վաշինգտոնին դադարեցնել «Եմենի ժողովրդի սպանությունները»:

«Անցյալ տարի Բայդենին խաբեությամբ ստիպեցին աննախադեպ 23 միլիարդ դոլար փոխանցել ցեղասպանություն իրականացնող ռեժիմին։ 60․000-ից ավելի պաղեստինցի զոհվեց, և աշխարհը դրա պատասխանատվությունը դնում է Ամերիկայի վրա: Դադարեցրեք Իսրայելի կողմից ցեղասպանության և ահաբեկչության աջակցությունը։ Դադարեցրեք սպանել եմենցիներին»,- նշել է Իրանի արտգործնախարարը։

Ավելի վաղ ԱՄՆ նախագահ Դոնալդ Թրամփը հայտարարել էր, որ հրամայել է երկրի զինված ուժերին «վճռական և հզոր ռազմական գործողություններ» սկսել Եմենի հութիների դեմ։

Նա հայտարարել է, որ Անսար Ալլահի գրոհայինները զբաղվում են ծովահենությամբ, բռնությամբ և ահաբեկչությամբ ամերիկյան և այլ նավերի ու ինքնաթիռների դեմ: Սպիտակ տան ղեկավարը նաև հայտնել է, որ եթե Իրանը փորձի որևէ օգնություն ցուցաբերել շարժմանը, ապա ԱՄՆ-ն Իսլամական Հանրապետությանը լիակատար պատասխանատվության կոչ կանի: Շարժման առողջապահության նախարարությունը հայտնել է ԱՄՆ-ի ավիահարվածների հետևանքով 31 զոհի և ավելի քան 100 վիրավորի մասին։