Զելենսկին ասել է՝ ինչու է համաձայնել ԱՄՆ-ի առաջարկին

Ուկրաինան համաձայնել է ամբողջ տարածքում 30-օրյա հրադադարի մասին ԱՄՆ-ի առաջարկին՝ ցույց տալու համար, որ Ուկրաինան պատրաստ է խաղաղության։ Այս մասին հայտարարել է Ուկրաինայի նախագահ Վլադիմիր Զելենսկին։ 

Նա նշել է, որ մինչ Սաուդյան Արաբիայում Ուկրաինայի և ԱՄՆ-ի հանդիպումը խոսվել է օդում և ծովում հրադադար առաջարկելու մասին։ Բայց հետո ամերիկյան կողմն այլ մոտեցում է առաջարկել։

Զելենսկիի խոսքով՝ հանդիպման կեսին իր հետ կապվել է ուկրաինական թիմը, իսկ ԱՄՆ կողմը՝ նախագահ Դոնալդ Թրամփի հետ, և հարց բարձրացրել՝ արդյո՞ք Կիևը պատրաստ է քայլեր ձեռնարկել ամբողջ տարածքում հրադադար ապահովելու համար։

«Ես սա բազմիցս ընդգծել եմ, մեզանից ոչ ոք չի վստահում ռուսներին, մենք անցել ենք դրա միջով, բայց մենք չենք խաղալու այն նարատիվների հետ, որ չենք ուզում՝ պատերազմն ավարտվի։ Ես շատ լուրջ եմ և ինձ համար կարևոր է պատերազմի ավարտը, ես ուզում եմ, որ ԱՄՆ նախագահը տեսնի դա, որպեսզի Եվրոպան, բոլորը, դաշինքի մեջ լինեն, որպեսզի Ռուսաստանի Դաշնությանը ստիպեն դադարեցնել պատերազմը։ Ուստի իմ արձագանքն այն էր, որ մենք պատրաստ ենք 30-օրյա լռության այն ձևաչափով, որը մեզ առաջարկել է ամերիկյան կողմը»,- պարզաբանել է Ուկրաինայի նախագահը։