Արարատ Միրզոյանը պատասխանել է Ադրբեջանի կողմից հնչեցրած կարծիքներին

ՀՀ–ն չի ստանձնել որևէ պարտավորություն` ներառյալ տարածաշրջանային հաղորդակցությունների ապաշրջափակման մասով, որ չի կատարել։ Այդ մասին ՀՀ ԱԺ–ում կառավարության հետ հարցուպատասխանի ժամանակ հայտարարեց ՀՀ արտաքին գործերի նախարար Արարատ Միրզոյանը։

Նա պատասխանեց «Քաղաքացիական պայմանագիր» խմբակցության պատգամավոր Լիլիթ Մինասյանի այն հարցին, որ Ադրբեջանի ԱԳՆ–ից կարծիք է հնչել տարածաշրջանային հաղորդակցությունների ապաշրջափակման մասով ՀՀ առաջարկների վերաբերյալ և նշվել է, որ ՀՀ–ն չի կատարում իր պարտավորությունները, իսկ Հայաստանի առաջարկները գնահատվել են ոչ պրակտիկ։

«Մենք պատրաստ ենք օր առաջ բացել բոլոր ենթակառուցվածքները, սակայն հարցն այստեղ միայն Ադրբեջանի մասին չէ. ապաշրջափակումը ավելի լայն հասկացողություն է։ Մենք Թուրքիայի հետ ունենք խոսակցություն` Գյումրի–Կարս երկաթգծի մասով, մենք մեր հերթին նաև նպատակ ունենք Ադրբեջանի ենթակառուցվածքների միջոցով կապ հաստատել Կենտրոնական Ասիայի, Չինաստանի հետ»,– հայտարարեց Միրզոյանը։