ԿԽՄԿ-ն այցելել է հացադուլի մեջ գտնվող Ռուբեն Վարդանյանին. մանրամասներ

Փետրվարին ԿԽՄԿ-ն այցելել է Բաքվում անազատության մեջ գտնվող հայերին: Այս մասին լրագրողների հետ զրույցում հայտարարել է միջազգային կազմակերպության պատվիրակության հաղորդակցման ծրագրերի ղեկավար Զառա Ամատունին

Նա նշել է, որ այցելությունը տեղի է ունեցել Ռուբեն Վարդանյանի հացադուլի ժամանակ

«Մեր բժիշկը տեսակցել է հացադուլի մեջ գտնվող անձին, ի թիվս մեր պատվիրակների, որոնք տեսակցել են անազատության մեջ գտնվող բոլոր անձանց»,–ասել է Ամատունին։

Նրա խոսքով՝ երբ ասում են` հեռախոսակապի հնարավորություն է տրվում, շատ դեպքերում դա ընկալվում է, թե անվերապահորեն բոլորն օգտվում են դրանից։ Միայն հեռախոսակապ չէ, կապի տարբեր միջոցներ են կիրառվում, և դրանց մի մասը հատուկ համաձայնեցվում է Ադրբեջանի իշխանությունների հետ, այնինչ հիմնական կապը, որ թույլատրվում է, դա Կարմիր խաչի նամակներն են։

«Շատ դժվար է ասել` ինչը կարող է անձին դրդել հրաժարվել հեռախոսակապից։ Մարդիկ գտնվում են իրենց համար ոչ բնական պայմաններում, տարբեր որոշումներ կարող են կայացնել` իրենց վիճակից լինելով։ Բայց յուրաքանչյուր տեսակցության ընթացքում մենք նրանց փոխանցում ենք նամակներ կամ ուղերձներ իրենց հարազատներից»,- հավելել է նա։

Նշենք, որ այսօր Կարմիր խաչի հայաստանյան գրասենյակի դիմաց ակցիա են իրականացնում հայ գերիների ազատ արձակման համար և նրաց խոշտանգումների, Ռուբեն Վարդանյանի առողջական վիճակի վրա միջազգային կառույցների ուշադրությունը հրավիրելու համար։