Զելենսկի-Թրամփ թեժ զրույցի արձագանքներն ամբողջ աշխարհից
Միջազգային հանրությունն արձագանքել է ԱՄՆ նախագահ Դոնալդ Թրամփի և Ուկրաինայի նախագահ Վոլոդիմիր Զելենսկիի հանդիպմանը։ Եվրոպական երկրների ղեկավարները աջակցություն են հայտնում Ուկրաինային Թրամփի և Զելենսկու լարված հանդիպումից հետո:
«Դուք մենակ չեք»,- Ուկրաինային ասել է Լեհաստանի վարչապետ Դոնալդ Տուսկը:
«Մենք պետք է հարգենք նրանց, ովքեր կռվել են հենց սկզբից»,- ասել է Ֆրանսիայի նախագահ Էմանուել Մակրոնը և ընդգծել, որ ստեղծված իրավիճակում Ռուսաստանն ագրեսոր է, իսկ ուկրաինացիները՝ ագրեսիայի ենթարկված մարդիկ:
«Ուկրաինան Եվրոպան է։ Մենք կանգնած ենք Ուկրաինայի կողքին։ Մենք կուժեղացնենք մեր աջակցությունն Ուկրաինային, որ նրանք կարողանան շարունակել պայքարել ագրեսորի դեմ: Այսօր պարզ դարձավ, որ ազատ աշխարհին նոր առաջնորդ է պետք: Մենք պետք է նոր առաջնորդ ունենանք: Մենք՝ եվրոպացիներս, պետք է ընդունենք այդ մարտահրավերը»,- նշել է ԵՄ արտաքին քաղաքական ծառայության ղեկավար Կայա Կալասը:
«Ուկրաինա, Իսպանիան քեզ հետ է»,- մի քանի լեզուներով, այդ թվում՝ ուկրաիներենով, գրել է Իսպանիայի կառավարության ղեկավար Պեդրո Սանչեսը։
«Ճշմարտությունը պարզ է։ Ռուսաստանը ներխուժեց Ուկրաինա։ Ռուսաստանը ագրեսոր է: Ուկրաինան պաշտպանում է իր ազատությունը և մերը։ Մենք աջակցում ենք Ուկրաինային»,- գրել է Մոլդովայի նախագահ Մայա Սանդուն։
Ուկրաինացի քաղաքական գործիչները նույնպես աջակցել են Զելենսկուն։
«Լիակատար աջակցություն նախագահին: Ոչ ոք իրավունք չունի մոռանալ, որ այս պատերազմում Ռուսաստանն ագրեսոր է, իսկ Ուկրաինան ՝ ագրեսիայի զոհ»,- Սպիտակ տանը Զելենսկու հանդիպումից հետո X-ում անգլերենով գրել է Գերագույն ռադայի խոսնակ Ռուսլան Ստեֆանչուկը։
«Խաղաղությունն առանց երաշխիքների անհնար է»,- գրել է Երկրի վարչապետ Դմիտրի Շմիգալը։
«Աջակցում եմ նախագահին, որը պաշտպանում է մեր հերոսական ժողովրդի շահերը։ Յուրաքանչյուր իրավիճակում: Վերջակետ»,- նշել է Ուկրաինայի նախագահի գրասենյակի ղեկավար Անդրեյ Երմակը:
