Խաղաղության պայմանագիր ոչ թե վարչապետի, այլ ՀՀ-ի հետ. ադրբեջանցի պաշտոնյա

Ադրբեջանը ցանկանում է խաղաղության պայմանագիր կնքել հայկական պետության, ոչ թե վարչապետի հետ: Այս մասին հայտնել է Ադրբեջանի խորհրդարանի փոխնախագահ Զիյաֆեթ Ասկերովը:

Վերջինս պնդել է, որ պայմանագրի ստորագրումը հետաձգվում է ՀՀ-ի «մանիպուլյացիաների» պատճառով: 

Ասկերովի խոսքով՝ ՀՀ-ն ԱՄՆ նախկին նախագահ Ջո Բայդենի վարչակազմի ճնշման ներքո հետաձգել է խաղաղության պայմանագրի ստորագրումը։

«Մինչ օրս 17 կետից համաձայնեցված է 15-ը: Չհամաձայնեցված կետերից մեկը «Զանգեզուրի միջանցքի» բացումն է։ Հայաստանը այս գործընթացի խաթարման պատասխանատվությունը սկզբում գցեց Իրանի, հետո Ֆրանսիայի, ապա ԱՄՆ-ի վրա։

Երկրորդ կետը Հայաստանի Սահմանադրությամբ ամրագրված տարածքային պահանջներն են: Նրանց Անկախության հռչակագրում ասվում է, որ Լեռնային Ղարաբաղը պատկանում է Հայաստանին, սակայն Հայաստանի իշխանություններն արդեն հայտարարել են նոր սահմանադրության մշակման մասին։

Նիկոլ Փաշինյանը նաև ընդունել է, որ սահմանադրության նախորդ փոփոխությունները չեն կարող լեգիտիմ համարվել: Իսկ մենք ցանկանում ենք պայմանագիր կնքել ոչ թե վարչապետի, այլ Հայաստան պետության հետ», - ասել է նա: