Հարավային Կորեայի նախագահը ձերբակալվել է
Կորեայի Հանրապետության նախագահ Յուն Սոկ Յոլին ձերբակալելու գործողությունը տևել է ավելի քան յոթ ժամ։ Այս մասին հայտնում է Yonhap լրատվական գործակալությունը։
Նշվում է, որ ձերբակալության երկրորդ փորձը սկսվել է չորեքշաբթի տեղական ժամանակով ժամը 03:20-ին (երեքշաբթի՝ Երևանի ժամանակով 22:20-ին): Բնակավայր գնալու ճանապարհին քննիչները ստիպված են եղել հաղթահարել բարիկադների մի քանի շարք, այդ թվում՝ մեքենաներից պատրաստված։ Ընթացքում օգտագործվել են աստիճանական սանդուղքներ: Իրավապահ մարմինների և նախագահի անվտանգության աշխատակիցների միջև բանակցությունները տևել են մոտ երկու ժամ։
Բարձրաստիճան պաշտոնյաների հակակոռուպցիոն հետաքննության գրասենյակը հայտնել է, որ «նախագահ Յուն Սոկ Յոլի ձերբակալման հրամանը կատարվել է» տեղական ժամանակով ժամը 10:33-ին: Միաժամանակ Յուն Սոկ Յոլը հայտարարել է, որ որոշել է գնալ բաժին՝ արյունահեղությունը կանխելու համար, սակայն շարունակում է հետաքննությունը համարել անօրինական։ Ժամը 10:53-ին Յուն Սոկ Յոլը նախագահական անվտանգության ծառայությանը պատկանող մեքենայով բերման է ենթարկվել Հակակոռուպցիոն քննչական վարչության գրասենյակ։
Իրավապահ մարմինները 48 ժամ ունեն նախագահին հարցաքննելու համար, որից հետո պետք է դիմեն նրա կալանքը երկարաձգելու մեկ այլ հրամանագրի։ Տեղական ժամանակով ժամը 11:00-ին սկսված հարցաքննության նյութերը գերազանցում են 200 էջը։
