Անհրաժեշտ է փոփոխել օրենքները. Արսեն Թորոսյան

Auroranews-ը երեկ անդրադարձել էր, որ սոցիալական տարբեր հարթակներում պարբերաբար հայտնվում են տեսահոլովակներ, որոնք գովազդում են մեր երկրում ծառայություններ մատուցող կլինիկաներ, դեղատներ և տարբեր տեսակի դեղամիջոցներ: Գովազդային հոլովակներում, սակայն, բացակայում է հիշատակումը տվյալ կլինիկաների կամ դեղատան գործունեության լիցենզիայի մասին, ինչպես նաև ՀՀ առողջապահության նախարարության կողմից տրված գովազի թույլտվության մասին: Սա առողջապահության նախարարության կողմից սահմանված գովազդի վերաբերյալ պայմանների կոպիտ խախտում է և, ստացվում է, որ մի շարք բուժհաստատություններ և ընկերություններ մեր երկրում ապօրինի գործունեություն են ծավալել: Օրինակները բազմաթիվ են, որոնք առողջապահության նախարարության անգործության հետևանքով, այսպես ասած, ծաղկում են ապրում:

«Սոցիալական հարթակներում տեղի ունեցած փոփոխությունների հետևանքով գովազդների վերահսկողությունը չափազանց բարդ է դարձել: Այո, մենք հեռուտատեսության և այլ լրավականների գովազդների նկատմամբ շատ խիստ պահանջներ ունենք և դրանք շատ հեշտ է վերահսկել: Բայց երբ անթիվ անհամար կայքեր և օգտատերեր սոցցանցերում գովազդ են տեղադրում խնդիրը շատ է բարդանում: Մենք լիցենզավորման բաժնում շարունակ մոնիթորինգ ենք իրականացնում որոնողական մեթոդներով և խախտումներ հայտաբերելու դեպքում դիմում ենք տեսչական մարմիններին: Բայց ընդհանուր առմամբ այս խնդիրը ակտուալ է ոչ միայն Հայաստանում այլև աշխարհի տարբեր երկրներում»,- երեկ ասել էր ՀՀ առողջապահության նախարար Անահիտ Ավանեսյանը:

Առկա խնդրի և դրանց լուծումների շուրջ այսօր Auroranews-ը զրուցեց ԱԺ ՔՊ խմբակցության պատգամավոր, առողջապահության նախկին նախարար Արսեն Թորոսյանի հետ:

«Այո կա նման խնդիր, պետք է օրենքները փոփոխել և դրանք ավելի ժամանակակից դարձնել»- ասաց Թորոսյանը:

Վերջինս նշեց նաև, որ հավանաբար ինքը կնախաձեռնի օրենքի փոփոխության գործընթացը:

«Հավանաբար ես կնախաձեռնեմ, բայց հստակ ժամկետներ հիմա չեմ կարող ասել»,- հավելեց Թորոսյանը:

Ներկայում ստացվում է, որ հեռուստաընկերությունները այլ լրատվամիջոցները ԱՆ-ի կողմից գտնվում են խիստ վերահսկողության տակ և այսպես կոչված մանրադիտակով զնվում է սահմանված բոլոր դետալներն, իսկ սոցցանցերում միանգամայն բարձիթողի վիճակ է: