Չեչնիայում հայտնել են Բաքվից չվերթների չեղարկման և գումարի վերադարձի մասին
Գրոզնիի և Մախաչկալայի օդանավակայանները Բաքվից Azerbaijan Airlines չվերթների ժամանակավոր չեղարկման պատճառով խոսել են գնված տոմսերի գումարը վերադարձնելու հնարավորության մասին։ Այս մասին գրում է РИА Новости–ն:
Չորեքշաբթի Azerbaijan Airlines–ը հայտարարել է, որ չեղյալ է հայտարարել Բաքու-Գրոզնի-Բաքու և Բաքու-Մախաչկալա-Բաքու բոլոր չվերթերը՝ մինչև Ղազախստանի Ակտաու քաղաքի մոտ ադրբեջանական մարդատար ինքնաթիռի կործանման հետաքննության ավարտը:
Հիշեցնենք` դեկտեմբերի 25-ին Ղազախստանի Ակտաու քաղաքի մերձակայքում ընկել ու բռնկվել է Azerbaijan Airlines ավիաընկերության Embraer 190 ինքնաթիռը, որը կատարում էր Բաքվից Գրոզնի չվերթը: Այն աղետի է ենթարկվել օդանավակայանի հարևանությամբ։ Ինքնաթիռում եղել է 62 ուղևոր և անձնակազմի 5 անդամ։ Ըստ Ադրբեջանի գլխավոր դատախազության՝ 32 մարդ ողջ է մնացել։
