Մանրամասներ՝ Մագդեբուրգի Սուրբ Ծննդյան տոնավաճառում տեղի ունեցած ողբերգական ահաբեկչությունից
Ահաբեկիչն իր ավտոմեքենայով Գերմանիայի Մագդեբուրգ քաղաքի Սուրբ Ծննդյան տոնավաճառի տարածք է մտել արտակարգ ծառայությունների տրանսպորտային միջոցների համար նախատեսված ճանապարհով: Այս մասին այսօր հայտնել է Մագդեբուրգի ոստիկանության տնօրեն Թոմ-Օլիվեր Լանգանսը, գրում է РИА Новости–ն։
«Նա ցածր արագությամբ քշեց դեպի հետիոտնային անցում, այնուհետև օգտագործեց փրկարարական մուտքը հին շուկա հասնելու համար», - ասել է Լանգանսը Spiegel-ի Youtube–յան ալիքով հեռարձակված մամուլի ասուլիսում:
Մագդեբուրգի հասարակական կարգի պահպանման ղեկավար Ռոննի Կրուգի խոսքով, մուտքը պաշտպանված չէր արգելապատնեշներով կամ սյուներով, որպեսզի շտապ ծառայություններին թույլ տրվեր անխոչընդոտ օգտագործել այն: Ըստ պաշտոնյայի՝ ճանապարհը հսկվում էր շարժական ոստիկանական խմբերի միջոցով:
«Մենք կանգնել ենք հարձակման առաջ, որը, իմ կարծիքով, ոչ մի կազմակերպիչ չէր կարող կանխել»,- ընդգծել է նա։
Ուրբաթ երեկոյան ավտոմեքենան մխրճվել է Մագդեբուրգի Սուրբ Ծննդյան տոնավաճառում հավաքված մարդկանց մեջ։ Պաշտոնապես հարձակման հետևանքով զոհվել է 5 մարդ, վիրավորվել՝ ավելի քան 200-ը։
