Սիրիայում Պալմիրայի կամարի վերականգնման նախագիծը դադարեցվել է. Էրմիտաժի տնօրեն

Սանկտ Պետերբուրգի մասնագետները կասեցրել են Սիրիայում Պալմիրայի Հաղթական կամարի վերականգնման նախագիծը, լրագրողներին հայտնել է Էրմիտաժի գլխավոր տնօրեն Միխայիլ Պիոտրովսկին։

«Կան համակարգչային մոդելներ, աշխատանքներ են սկսվել Հաղթական կամարի վերականգնման համար տարածքի պատրաստման ուղղությամբ, մենք վերջերս քննարկել ենք ֆինանսավորման հետ կապված հարցեր, սակայն այժմ Սիրիայում իրավիճակն այնպիսին է, որ հենց Պալմիրայի տարածքն է ռմբակոծվել: Այսպիսով, առայժմ դադարեցրել ենք: Հսկայական աշխատանք արդեն արվել է, նախագիծը ինքնին նորագույն է»,- ասել է նա:

Պիոտրովսկին մտահոգություն է հայտնել նաև Սիրիայի այլ հնագույն հուշարձանների ճակատագրի վերաբերյալ։

«Այժմ վտանգ կա Սիրիայում այլ հուշարձանների համար՝ ոչ միայն հեթանոսական, այլև քրիստոնեական։ Նյութական մշակույթի ինստիտուտի արշավախումբը արձանագրել է բազմաթիվ քրիստոնեական հուշարձաններ, Սիրիան քրիստոնեության օրրանն է»,- նշել է Էրմիտաժի գլխավոր տնօրենը։

Հիշեցնենք, որ հաղթական կամարը թվագրվում է մ.թ. 3-րդ դարով, Սիրիայի խորհրդանիշն է և Պալմիրայի ամենահայտնի ճարտարապետական կառույցը։ Այն պայթեցվել է 2015 թվականի մայիսին «Իսլամական պետության» խմբավորման զինյալների կողմից։ Պայթյունից հետո 1800-ամյա Հաղթական կամարից մնացել են միայն քանդակազարդ սյուների արտաքին հենասյուները։