Ավտոբուսների վարորդների գործադուլը կշարունակվի
Երևանում ավտոբուսների վարորդների գործադուլը կշարունակվի նաև վաղը: Այս մասին «Երևան ավտոբուս» ՓԲԸ տնօրենի հետ հանդիպումից հետո լրագրողներին ասել է գործադուլավորներից մեկը։
«Կշարունակենք գործադուլն այնքան ժամանակ, մինչև լուծվի աշխատանքից ազատված վարորդների հարցը, վերանայվեն աշխատանքային պայմաններն ու աշխատավարձերը բարձրացվեն։ Ղեկավարությունը խոստացել է քննարկել ազատված վարորդների խնդիրը, եթե մնացածները վաղը աշխատեն»,-հայտարարել է գործադուլ անողներից մեկը։
Հիշեցնենք՝ այսօր վաղ առավոտից Երևանում ավտոբուսների վարորդները գործադուլ են սկսել։ Նրանք պահանջում են աշխատավարձի բարձրացում։ Ավտոբուսների վարորդների անսպասելի գործադուլին անդրադարձել է Երևանի քաղաքապետի խոսնակ Հայկ Կոստանյանը՝ տեղեկացնելով, որ դիմելու են պատկան մարմիններին՝ վերոնշյալ արարքներին պատշաճ քրեաիրավական գնահատական տալու նպատակով։ Հավելենք, որ այսօր 35 վարորդ աշխատանքից ազատվել է:
