Թրամփն անդրադարձել է Բայդենի՝ որդուն ներում շնորհելու որոշմանը

ԱՄՆ նորընտիր նախագահ Դոնալդ Թրամփը հայտարարել է, որ Ջո Բայդենի` իր որդուն՝ Հանթերին, ներում շնորհելու որոշումը չարաշահման և արդարադատության խախտման բացահայտ օրինակ է։

«Ջո Հանթերին շնորհված ներումը ներառո՞ւմ է հունվարի 6-ի «պատանդներին», որոնք մի քանի տարի անազատության մեջ են: Ինչպիսի չարաշահում և արդարադատության խախտում», - Truth Social սոցկայքում գրել է Թրամփը։

Հունվարի 6-ին «պատանդներ» ասելով՝ նա նկատի ունի իր աջակիցներին, ովքեր 2021 թվականի հունվարի 6-ին ներխուժել են Կապիտոլիում։

Հիշեցնենք, որ ԱՄՆ նախագահ Ջո Բայդենը, հունվարին պաշտոնը լքելուց առաջ, որդուն՝ Հանթեր Բայդենին, 2 քրեական գործով ներում է շնորհել: Խոսքը զենքի պահման օրենքի խախտման և հարկերից խուսափելու գործերի մասին է։ Սպիտակ տունն այս մասին հայտարարություն է հրապարակել, որում նախագահն ընդգծել է, որ որդու դեմ մեղադրանքները քաղաքական դրդապատճառներ ունեն։