Չափազանց հիասթափեցնող է և չափազանց տխուր․ ԵՄ դեսպան
Վրաստանն այլեւս շահագրգռված չէ առաջիկա չորս տարիների ընթացքում Եվրամիությանն ինտեգրվելու ճանապարհով գնալու հարցում, դա երկրի իշխանությունների սուվերեն որոշումն է, որը չափազանց հիասթափեցնող է։ Այս մասին հայտարարել Է Վրաստանում ԵՄ դեսպան Պավել Գերչինսկին:
Երեկ Վրաստանի վարչապետ Իրակլի Կոբախիձեն հայտարարել էր, որ իշխանությունները որոշում են կայացրել մինչև 2028 թվականը օրակարգից հանել Եվրամիությանը երկրի անդամակցության շուրջ բանակցությունների բացումը և որոշել են հրաժարվել կառավարության համար դրամաշնորհներ ստանալուց: Դրան հաջորդեց բողոքի բազմամարդ ակցիան, որն ավարտվեց հատուկջոկատայինների կողմից ցուցարարների մաքրմամբ:
«Մենք բացեցինք մեր դռները, Եվրամիության դռները Վրաստանի, Ուկրաինայի և Մոլդովայի համար։ Ուկրաինան և Մոլդովան արագ տեմպերով առաջ են շարժվում։ Ինչպես երեկ լսեցինք, Վրաստանն այլևս շահագրգռված չէ առաջիկա չորս տարիների ընթացքում հետևել Եվրամիությանը ինտեգրվելու ուղուն։ Սա Վրաստանի իշխանությունների ինքնիշխան որոշումն է, բայց չափազանց հիասթափեցնող է և չափազանց տխուր», - նշել է դեսպանը։
Նրա խոսքով՝ վրաց ժողովուրդն ինքը պետք է որոշի, թե որտեղ է ուզում տեսնել իր երկիրը։
«Իմ ուղերձն այսպիսին է՝ մենք աջակցում ենք վրաց ժողովրդին, մենք կսպասենք ձեզ։ Սա ձեր երկիրն է, եւ դուք պետք է որոշեք, թե որտեղ եք ցանկանում տեսնել այն», - ընդգծել է դեսպանը։
Ներկայումս Վրաստանը Եվրամիությանն անդամակցելու թեկնածու երկիր է։ Այդ կարգավիճակը երկիրը ստացել է 2023 թվականի դեկտեմբերին՝ Ուկրաինայից և Մոլդովայից մեկ տարի անց, ինչը վրացական իշխանություններն անարդարություն են անվանել։ Ուկրաինայի և Մոլդովայի հետ բանակցությունները բացվել են հունիսի 25-ին, իսկ ԵՄ-ին Վրաստանի ինտեգրման գործընթացը դադարեցվել է:
