Դուդայի` Երասխ այցից հետո Բաքվում Լեհաստանի գործերի հավատարմատարին կանչել են ԱԳՆ

Այսօր Ադրբեջանի Արտաքին գործերի նախարարություն է կանչվել Բաքվում Լեհաստանի գործերի ժամանակավոր հավատարմատար Միխալ Գրեչիլոն։ Այս մասին հայտնել են երկրի ԱԳՆ-ից: Տեղեկությունը փոխանցում են ադրբեջանական լրատվամիջոցները:

Նշվում է, որ հանդիպման ընթացքում դիվանագետին բողոք է արտահայտվել այն բանի համար, որ, չնայած ադրբեջանական կողմի նախազգուշացումներին, Լեհաստանի նախագահ Անջեյ Դուդան այցելել է Երասխ և հանդիպել ՀՀ-ում ԵՄ առաքելության դիտորդների հետ։

Բաքվից հայտարարում են, թե այս քայլը հակասում է ադրբեջանա-լեհական հարաբերություններին, և անհրաժեշտ է խուսափել այնպիսի քայլերից, որոնք շոշափում են «Ադրբեջանի օրինական անվտանգության շահերը»։

Հիշեցնենք` ավելի վաղ հայտնել էինք, որ Ադրբեջանի ԱԳՆ-ն դժգոհություն էր հայտնել Լեհաստանի նախագահ Անջեյ Դուդայի հայ-ադրբեջանական սահմանամերձ գոտու տարածքում Եվրամիության դիտորդական առաքելության լեհ դիտորդների հետ հանդիպման կապակցությամբ: