Դա այն է, ինչ պետք է անել, որպեսզի ռազմական գործողությունները դադարեցվեն․ Պեսկով
Ուկրաինական հակամարտության սառեցման ծրագիրը, որն, ըստ Bloomberg գործակալության, պատրաստվում է ներկայացնել Թուրքիայի նախագահ Ռեջեփ Թայիփ Էրդողանը, Ռուսաստանին հարմար չէ: Այս մասին ճեպազրույցի ժամանակ հայտարարել է ՌԴ նախագահի մամուլի քարտուղար Դմիտրի Պեսկովը։
«Մենք ուշադրություն ենք դարձրել Bloomberg-ի հրապարակմանը, սակայն տվյալներին չենք տիրապետում։ Մարտական բախման գծով «սառեցման» տարբերակն անընդունելի է ռուսական կողմի համար։ Նախագահ Պուտինի ձևակերպած պայմանները պահպանում են արդիականությունը։ Դա այն է, ինչ պետք է անել, որպեսզի ռազմական գործողությունները դադարեցվեն»,- ասել Է Կրեմլի ներկայացուցիչը։
Ավելի վաղ Bloomberg-ը, վկայակոչելով իր աղբյուրները, հայտնել էր, որ Էրդողանը մտադիր է առաջարկել Ուկրաինայի առաջնորդ Վլադիմիր Զելենսկուն հետաձգել ՆԱՏՕ-ին անդամակցելու հարցի քննարկումը առնվազն 10 տարով՝ որպես զիջում Ռուսաստանին:
