Մանրամասներ՝ կենդանուն դաժանորեն տանջամահ անելու աղմկահարույց դեպքից
Կենդանու նկատմամբ դաժան վերաբերմունք ցույց տալու կասկածանքով ձերբակալված Արարատի մարզի Ավշար համայնքի 53-ամյա բնակչի նկատմամբ նախաձեռնվել է վարույթ։ Այս մասին Auroranews-ին հայտնեց Քննչական կոմիտեի մամուլի խոսնակ Գոռ Աբրահամյանը։
«Արարատի մարզային քննչական վարչության Վեդիի քննչական բաժնում դեպքի առթիվ վարույթ է նախաձեռնված քրեական օրենսգրքի՝ 307-րդ հոդվածի 2-րդ մասի, 1-ին և 2-րդ կետերի հատկանիշներով (կենդանիների նկատմամբ դաժան վերաբերմունքը, որը կատարվել է մի խումբ անձանց կողմից առանձնակի դաժանությամբ): Մեկ անձի, որը ներկայացվել էր ոստիկանության կողմից քննչական մարմին, ձերբակալելու որոշում է կայացվել, այս պահին վերջինս արգելանքի տակ է։ Մնացած հանգամանքները պարզվում են»,- մեզ հետ զրույցում նշեց Աբրահամյանը։
Ավելի վաղ էլ ՆԳՆ ոստիկանության մամուլի խոսնակ Զարզանդ Գաբրիելյանն Auroranews-ին հայտնել էր․ «ՆԳՆ ոստիկանության Արարատի մարզային վարչության և Արարատի բաժնի ծառայողները հայտնաբերել և կենդանու նկատմամբ դաժան վերաբերմունք ցույց տալու կասկածանքով ձերբակալել են Արարատի մարզի Ավշար համայնքի 53-ամյա բնակչին»:
Հիշեցնենք՝ երեկ համացանցում տեսանյութ էր տարածվել կենդանիների նկատմամբ դաժան և անմարդկային վերաբերմունքի մասին:
