Թրամփը սպառնացել է Պուտինին հարվածել Մոսկվային

ԱՄՆ նախկին նախագահ Դոնալդ Թրամփը հայտարարել է, որ սպառնացել է Ռուսաստանի նախագահ Վլադիմիր Պուտինին հարված հասցնել Մոսկվային: Այս մասին նա հայտարարել է The Wall Street Journal -ին տված հարցազրույցում:

«Ես ասացի. «Վլադիմիր, եթե դու հետապնդես Ուկրաինային, ես քեզ կհարվածեմ այնքան ուժեղ, որ անգամ չես էլ հավատա։ Ես հարված կհասցնեմ հենց այդ չարաբաստիկ Մոսկվայի կենտրոնին» (in the middle of fricking Moscow)։ Ես ասացի. «Մենք ընկերներ ենք, ես չեմ ուզում անել դա, բայց ես ընտրություն չունեմ»,- տեղեկացրել է Թրամփը հարցազրույցում։

Թրամփի խոսքով՝ Պուտինը նրան պատասխանել է «No way» (կարելի է թարգմանել «Չի կարող պատահել», «Ոչ մի դեպքում» կամ «Դե չէ»)։

«Ես ասացի. «Քեզ այնպիսի հարված կհասցվի, եւ ես կհանեմ այդ սատանայի տարած գմբեթները քո գլխից»։ Որովհետեւ, գիտեք, նա ապրում է գմբեթների տակ»,-պատմել է ԱՄՆ նախագահի թեկնածուն։ 

Թրամփը չի նշել, թե երբ եւ ինչ հանգամանքներում է տեղի ունեցել իր խոսակցությունը Պուտինի հետ։ Նա ավելացրել է, որ ինքը «հիանալի հարաբերություններ ունի» ՌԴ նախագահի, ինչպես նաեւ Չինաստանի նախագահ Սի Ծինփինի հետ։ Ե՛վ Սի Ծինփինը, ե՛ւ Վլադիմիր Պուտինը, ըստ Թրամփի, գիտեն, որ ինքը «գիժ... է» («fucking crazy»)։