Մոլդովայի եվրաինտեգրման կողմնակիցների թիվը գերազանցել է հակառակորդների թվին

Մոլդովայում եվրաինտեգրման հարցով հանրաքվեի «կողմ»  և «դեմ» ընտրողների թիվը տոկոսային հարաբերակցությամբ հավասարվել է և կիսվել հավասար մասերի՝ 50,00%: Ընդ որում, «կողմ» քվեարկողների թիվը 88-ով ավելի է: Այս մասին գրում է РИА Новости–ն՝ հղում տալով երկրի Կենտրոնական ընտրական հանձնաժողովին, որն արդեն մշակել է ձայների 97,66%–ը:

Համաձայն ԿԸՀ–ի հաշվարկի՝ ԵՄ–ին անդամակցելու գաղափարին աջակցել է երկրի 721 760 ընտրող, դեմ է եղել 721 672-ը:

Ընդ որում՝ առաջին արդյունքները ցույց էին տվել ինտեգրացիայի հակառակորդների հաղթանակը: Նախնական տվյալներով՝ ձայների հարաբերակցությունն այսպիսի տեսք ուներ. 58,09%՝ «դեմ», և 41,3%՝ «կողմ»: Այնուամենայնիվ հաշվարկի ընթացքում այս տարբերությունը սկսեց կրճատվել:

Հանրաքվեի շրջանակում քաղաքացիները պետք է պատասխանեին մեկ հարցի. «Արդյոք աջակցում եք Մոլդովայի Հանրապետության՝ Եվրոպական Միությանը անդամակցելու նպատակով սահմանադրության փոփոխություններին»: