Մեծ Բրիտանիայի թագավոր Չարլզ III-ը կնոջ՝ թագուհի Կամիլայի հետ Ավստրալիա կատարած հնգօրյա այցի ժամանակ հայտնվել է սկանդալի կենտրոնում։ Այս մասին հայտնում է The New York Post-ը։

Այսօր Չարլզ III-ը ելույթ է ունեցել Ավստրալիայի խորհրդարանում։ Այն բանից հետո, երբ Մեծ Բրիտանիայի թագավորն ավարտել է իր ելույթը, Ավստրալիայի Վիկտորիա նահանգի սենատոր Լիդիա Թորփը քննադատել է նրան։ Նա բեմ է դուրս եկել՝ բղավելով «սա ձեր հողը չէ»։

«Մեզ վերադարձրեք մեր հողը։ Վերադարձրեք մեզ այն, ինչ գողացել եք մեզանից՝ մեր ոսկորները, մեր երեխաներին, մեր ժողովրդին։ Դուք մեր թագավորը չեք։ Դուք քանդեցիք մեր հողը»,- բղավել է սենատորը։

Հաղորդվում է, որ անվտանգության աշխատակիցները Լիդիա Թորփին արագ հեռացրել են դահլիճից՝ թույլ չտալով նրան մոտենալ թագավորին։

Ավելի վաղ Daily Mail-ը գրել էր, որ Մեծ Բրիտանիայի թագավոր Չարլզ III-ի պաշտոնական այցը Ավստրալիա, որի պատճառով նա դադարեցրել էր քաղցկեղի բուժումը, սպառնալիքի տակ է. Ավստրալիայի բոլոր վեց նահանգների վարչապետները, որոնք հրավիրվել էին թագավորի այցի պատվին ընդունելությանը, տարբեր պատճառներով հրաժարվել են մասնակցել դրան։ Ավստրալիայի մայրաքաղաքում շատ այլ հայտնի քաղաքական գործիչներ ևս հրաժարվել են թագավորի հետ հանդիպել։