Ինչու էին ձերբակալվել Միհրան Պողոսյանի կուսակցության անդամները․ մանրամասներ

ԴԱՀԿ նախկին պետ, ԱԺ նախկին պատգամավոր Միհրան Պողոսյանի «Հայոց համազգային միասնություն» կուսակցության 8 անդամներ ձերբակալվել և տեղափոխվել են ոստիկանության բաժին ապօրինի զենք-զինամթերք կրելու և պահելու կասկածանքով։ Sputnik Արմենայի հետ զրույցում հայտնեց ՀՀ ՆԳՆ մամուլի խոսնակ Նարեկ Սարգսյանը։

Ավելի վաղ կուսակցությունը հայտնել էր, որ երեկ երեկոյան՝ 23:15-ի սահմաններում բերման են ենթարկվել ՀՀՄ փոխնախագահ Արարատ Ավետիսյանը, ԳՄ անդամներ Հայկ Ստեփանյանը, Արմինե Սիմոնյանը, ինչպես նաև կուսակցության երիտասարդական միության այլ անդամներ։

«8 անձ ապօրինի զենք-զինամթերք կրելու և պահելու կասկածանքով ձերբակալվել և տեղափոխվել են ՆԳՆ ոստիկանության Շենգավիթի բաժին, իսկ 1 անձ, նույն կասկածանքով ձերբակալվել և տեղափոխվել է ՆԳՆ ոստիկանության Կենտրոնական բաժին»,- ասել է Սարգսյանը։

Նրա խոսքով՝ ձերբակալվածներից 8-ն արդեն ազատ են արձակվել, իսկ 1 անձ ներկայացվել է նախաքննական մարմին:

Հիշեցնենք, որ «Հայոց համազգային միասնություն» կուսակցության փոխնախագահ Արարատ Ավետիսյանը և մամուլի խոսնակ Հայկ Ստեփանյանը ձերբակալվել էին նաև օգոստոսին, այնուհետև ազատ էին արձակվել։